MINGGU JUBILATE

TURPUK JAMITA MINGGU JUBILATE 21 APRIL 2013 “OLOPHON JALA ENDEHON HAMU MA DENGGAN BASA NI JAHOWA” (PSALMEN 66:1-7)

          Dihamu angka dongan nahinaholongan dibagasan Goar ni Jesus Kristus, ia goar ni minggunta sadarion ima minggu JUBILATE, namarlapatan doi amang dohot inang songoni nang angka naposobulung: “MAROLOPOLOP TU DEBATA MA SANDOK TANO ON”. Jala laos umbuk do nang turpuk Jamita tugoar ni minggunta sadarion, ima na tarsurat di Buku ni Par-Psalmen, Psalmen Binduna na paonompuluonomhon, mamungka ma I sian ayat naparjolo tolhas tu ayatna napapituhon. 

        Dihamu angka dongan sahaporseaon! Molo tapaihut ihut dohot denggan angka pandohan ni turpuk on mamungka sian ayat parjolo sahat tu ayat na mangujungi, jumpa hita do sada singot singot: Asa ganup bangso Mamuji Debata siala Pambahenannai, Pangaramotionnai, dohot pandonganion ni Debata ditongatonga ni sejarah parngoluon ni bangsoi. On do nagabe sibonsiri asa ingkon marolopolop saluhutna bangsoi, alana dirajumi roha nasida do songondia pandonganion ni Debata (Pengalaman Khusus) mamungka haruar nasida sian tano Misir, uju di Parhorsihan nasida, sahat tu na tolhas nasida tu Tano Kanaan tano nanimiahan ni Debata, tano habaoran ni susu dohot situak niloba tongtong do nasida diparmudu jala diramoti Tuhan Debata. On do na apala olop olop na bolon ni bangsoi napinasahat marrumanghon ende puji pujian manang ginoaran Psalmen.

        Dihamu angka dongan nahinaholongan. Dibagasan kesadaran manang panandaion na songoni do nang Raja David manurathon buku Psalmen on, tarlumobi ma turpuk naumbuk tabege di minggunta sadarion. Dibuhai ma I sian panandaion diri (perenungan pribadi) namansai bagas taringot tu nasa sangkap hatuaon ni Debata na tung mansai balga tu bangso Israel, mamungka haruar nasida sian parhatobanon Misir. Hinorhon manang nionjar ni panandaion I (hasil perenungan i) ma par-Psalmen on asa ringkot dirajumi rohana: Sude nasa jolma marolop olop mamuji Debata, gariada tahe tung saluhut tano on diigil parpsalmen on ingkon patuduhon OLOPOLOPNA manghalashon denggan basa ni Debata. Dihamu angka dongan nahinaholongan! Memang Pengalaman Khusus ni bangso Israel do haborhatan ni Parpsalmen on (RAJA DAVID) laho patoranghon panandaionna taringot ISE DO DEBATA dohot angka ragam ni Haluaon na PintupaNa. Alai tung pe songoni ndada namarlapatan naingkon Pengalaman ni bangso I satu-satunya ojahan ni Parolopoloponta tu Debata. Alai marhitehite pengalaman ni bangsoi naeng ma tangkas marbungaran jala mangerbang tahitahina laho manomba dohot mangolophon Debata di saluhut gulmit ni ngoluna. Asa ndada holan bangso Israel diigil Debata gabe bangsoNa huhut rade marsomba tu Ibana; alai saluhutna do. Tarida doi amang dohot inang diayat 3-4 i.

       Dihamu Amanami, Inanami, suang songoni angka naposo bulung nahinaholongan! Jubilate! Namarlapatan do I Marolopolop! Molo didok hata Olop olop, namarlapatan do I amang, inang gombaran ni sebuah situasi sukacita. Isarana: JUBELEUM 150 taon HKBP, JUBELEUM Pesta Perak (25 taon) pardongan saripeon, JUBELEUM Pesta Emas (50 taon) ari hatutubu, dohot lan angka naasing. Jubeleum nanidok na dison marharoroan do I amang dohot inang sian hata Jubilate, lapatanna: Marolopolop! Marolopolop do hurianta HKBP di pesta Jubeleum 150 taon, ala tarajumi do didongani Asi dohot holong ni Debata hurianta. Marjubeleum do inanta si adui ala nunga gonop umurna 50 taon dohot lan angka naasing. Jadi so tung adong ro tupingkiranta molo didok jubeleum namarlapatanmai marulang tahun ate. Molo didok Jubeleum/jubile/jubilate namarlapatan ma i las niroha manang olop olop. Suang songoni do nang parpsalmen na dipatorang diturpukhon marjubilate manang marjubeleum, manang marolop olop disiala pananadaionna di Debata. 

          Dihamu angka dongan nahinaholongan! Molo tauji jo manangkasi ayat patoluhon i. Sada hal namansai maol ditonga ni parngoluon on ima manjalo hata pujian manang hata nadenggan sian musunta. Gari sahundulan pe maoldo dohot musu, lam pasadahon pingkiran dohot mangigil nadenggan? Ndada ulaon naso mungkin do i? Dihatindanghon parpsalmen ido, ndang adong namargogo saluhut musu di adopan ni Debata. On do nang apala Olop olop namansai balga situtu ditonga tonga ni ngolunta. Dihamu angka dongan nahinaholongan! Diado impola ni Jamita na gabe mutiha na arga sipeoponta jala nanaeng siulahononta ditonga tonga ni ngolunta? 

         Naparjolo: Tama do hita manghalomohon las ni roha dibagasan ngolunta, alai porlu pamanatonta las ni roha dia do nuaeng nanaeng sihirimonta dibagasan ngolunta? Tontu las ni roha NAMIAN DIBAGASAN DEBATA ido olop olop jala las ni roha di denggan ni BasaNa. Alai molo las ni roha portibion do sihirimonta, las ni roha paratongkinan doi jala naboi manjehehon hita tu bagasan jea. Isarana: Halak namangulahon korupsi, toho do marlas niroha nasida alai tulelengna gabe hatahuton ibana. Sadihari ro Komisi Pemberantasan Korupsi laho manangkup ibana dohot lan angka na asing. Alai molo hita naporsea, holan dibagasan Jesus do jumpang hita lasniroha. Ido umbahen didok Apostel Paulus di Pilippi 4:4 Marlas ni roha ma hamu tongtong di bagasan Tuhan I, hu ulahi mandok marlas ni roha ma hamu. 

      Napaduahon: Halak na marjubilate/namarolopolop ima halak namarnida pamujion I secara holistic lapatanna bagas pangantusionna taringot tu haulion ni tinompa ni Debata. Boha do hita songon halak naporsea marnida paboa nasa suansuanan, nasa gulokgulok, dohot nasa namanggulmit I marsomba, marolopolop tu Debata. Halak namarjubilate ima halak namanghalashon ujung ni ngoluna ima las ni roha dibagasan Kristus Jesus naung manghophop hita asa panean hita diharajaonNa nag ok las ni roha nang olopolop. Antong SELAMAT MARJUBILATE MA DIHITA SALUHUTNA, dipargogoi Debata ma hita manghangoluhon hataNa. Amen

                                                                                            

                                                                                  

  
                                                                                           Buhit, Medio April 2013 Pinatomutomu ni:

                        

                                                                                                            St. RF. Simbolon, S.Th